Ciidamada Ethiopia ayaa saaka lagu arkay dhowr xaafadood oo ay ka mid yihiin Suuqa Xoolaha, Sos iyo Xaafadaha u dhowr Fariisinka ay ku leeyihiin Xaruntii Xisbiga iyo Stadium Muqdisho.

Dadka Deegeenka ayaa mar qura ka argagaxay soo gelitaanka Ciidamadan oo ahaa kuwo aad u feejigan, iyadoo xaafadaha qaarna ay la soo galeen Taangiyadooda.

Kooxo aan la garaneyn ayaa xalay weerar ku qaaday Fariisimada ciidamada Ethiopia ay ku leyihiin garoonka Stadium Muqdisho, iyadoo aan la ogeyn qasaaraha soo kala gaaray.

Warar la helayo ayaa sheegaya in iska hor imaadyada xalay ka dhacay Agagaarka Stadium Muqdisho ay ku dhaawacmeen Labo gabdhood oo rasaas habow ah ay guryahooda ugu tagtay.

Deegaanka Cali Kamiin iyo Xamar jadiid ayaa ka mid ah goobaha Ciidamadan lagu arkay oo wado walba taagan, kuwaasoo ahaa kuwo taagna wado walba.

Dhinaca kale soo gelitaanka Ciidamada Ethiopia ee Qeybo ka mid ah Degmada Huriwaa ayaa ka dambeysay kadib markii maalinimadii shalay ay Ciidamadii booliska ay halkaas faarujiyeen.

Si kastaba ha ahaatee Wali waxaa ka jira magaalada Muqdisho rabshado iyo waliba iska horimaadyo joogto ah oo dhex mara ciidamada dowladda iyo kooxo hubeysan oo ka soo horjeeda, iyadoo inta badana dad rayid ah ay ku aafoobaan tacshiiradaha ay isdhaafsadaan.

Xaalada Wiil dhalinyaro Mu'aadin ka ahaa Masjid ku yaal Shibis oo ay dhaawaceen Ciidamada Booliska ayaa laga deyrinayaa.

Ciidamo ka tirsan Booliska Dowladda oo howlo roondeyn ah ku marayay Xaafado ka tirsan Degmada Shibis ayaa si miyir la'aan ah rasaas ugu furay Wiilka Mu'aadinka ahaa, xilli uu ku sugnaa Gudaha Masjidka kadib salaadii Cishaha.

Dadka Deegaanka ayaa sheegaya in dhacdadan oo aheyd mid aad looga naxo ay Ciidamada rasaasta ay ugu dhex bixiyeen Dariishada Masaajidka, taasoo ka haleeshay Madaxa.

Dhaawaca Mu'adinkan ayaa la dhigay Cusbitaalka Keysaney, iyadoo uu xaalad kooma ah ku jiro.

Ehelada wiilka Mu'adinka oo lagu Magacaabo Bashiir ayaa sheegay in wiilkooda falka lagu dhaawacay ay tahay mid gardaro ah, isagoo waliba ku jiray Beytka Ilaahey.

Ciidamada Booliska iyo kuwa Dowladda ayaa lagu eedeeyaa in ay gabood fallo ka geystaan Magaalada Muqdisho, waxaana maalmahan ay ugaarsi kala duwan ku hayeen dadka wadaadada ah oo aad ugu dhegan Diinta, iyadoo sidoo kalena ay jirto in Macalimiin badan oo Dugsi quraan ah ay qafaasheen.

WFP oo Gargaar Caalami ah u dalabtay Kumanaan Kun oo Soomaaliyed oo ka barakacaya Colaado iyo abaaro ka dhacay dalka

WFP waxay doonaysaa in Beesha Caalamka si deg deg ah ugu jawaaban baahida dadka Soomaaliyed, Haddii lacagtan la helo WFP waxa ay awood u heli doontaa inay soo iibiso 17,000 oo tan oo raashin oo lagu daboolo cunta yaraanta jirta maadaama tirada Soomaalida isku haleenaysa gargaarka bani'aadnimo ay gaartay 1.2 milyan oo dad ah, sida uu sheegay agaasimaha WFP ee Soomaaliya Peter Goossens.

Dhamaadkii Sanadkii hore markii Ciidamada wada socda ee Dowladaha Itoobiya iyo Soomaaliya ay la wareegeen Caasimadda Muqdisho waxaa Magaalada ka dhacay dagaal faraha looga gubtay dagaalkaas oo sababay dhimasho, dhaawac iyo barakac aad u weyn, sidoo kale warbixin laga helay Qaramada Midoobay ayaa lagu sheegay in 18000 oo ruux ka qaxeen bishoo Ogoste Magaalada Muqdisho Labo Xaafadood oo ka tirsan.

Afhayeenka u hadlay WFP waxaa uu sheegay in afar bilood ay ku qaadanayso sidii gargaar cunto loo gaarsiin lahaa dadka u baahan, isagoo intaa ku daray in loo baahan yahay lacago kaash ah maadaama raashinka laga soo iibinayo wadamada deriska la ah Soomaaliya.

Dadka dhaliila howlaha ay qabato WFP waxay sheegayan inaan raashinka sidii loo baahnaa loo gaarsiinaynin dadka baahan, sabab lagu sheegay raashin fara badan oo WFP leedahay oo lagu arkay suuqyada Muqdisho ayadoo la iibinayo.

Magaalada Muqdisho oo saaka xasilooni aan caga adag ku taagneyn ku waabariisatay.

Kooxo ku hubaysan gantaalaha garabka laga rido ee Baasuukayaasha iyo rasaasta daran-dooriga u dhacda ayaa weerar ku qaaday garoonka K/cagta ee Stadium Muqdisho oo ay ku jiraan Ciidamo Ethiopia oo halkaasi fariisin ka dhigtay wixii ka dambeeyey Dagaalkii kululaa ee ee bilihii Marso iyo Apriil ka dhacay Muqdisho.

Ciidamada Ethiopia ayaa weerarkaas kaga jawaabay rasaas xooggan oo ay madaafiic ku jirtay, iyagoona intaa ka dib la soo baxay dabaabadaha dagaalka gaar ahaan Taangiyada oo ay xaafadaha dhaxdooda lasoo galeen, walow ay goor dambe dib uga laabteen fariisankooda.

Sidoo kale weeraro qaraxyo xambaarsanaa ayaa xalay fiidkii ka dhacay qeybo ka mid ah Wadada Sodonka, kuwaasi oo u dhaxeeyey Ciidamada Dowladda KMG ee halkaasi ku sugan iyo kooxaha ku kacsan ee weerarada la beegsada inta badan.

Ugu yaraan Laba caruur ah oo ay da'doodu u dhaxayso 3-ilaa-4-sano jir ayaa inta la ogyahay ku dhaawacmay iska hor imaadyadii xalay ka dhacay qeybo ka mid ah Caasimadda.

Qeybo ka mid ah Ganacsigii Suuqa Bakaaraha oo dib u howl galay, iyadoo Ciidamadii Dowladda ay isaga baxeen Suuqaas.

Dhamaan Waddooyinka soo gala Suuqa ayaan lagu arkin Ciidamo ka tirsan Dowladda Federaalka marka laga reebo Isgoyska Bakaaraha oo lagu arkayay Ciidamo tiro yar oo Boolis ah.

Suuqa Bakaaraha oo ah Suuqa ugu weyn Soomaaliya waxaa haystay muddooyinkii dambe mushkilad dhinaca Nabadgalyada ah kadib markii suuqa ku soo bateen kooxaha ugaarsada dadka aan waxba galabsan.

Ganacsiga ayaa guud ahaan furan saaka, mana jiraan wax iska hor imaadyo ah oo Suuqa laga maqlay saaka, waxaana la arkayay boqolaal dadweyne oo caadi u wata howshooda Ganacsi.

Dhinaca kale waxaa socda kulan la filayo in saacadaha soo socda yeeshaan Ganacsatada Gobolka Banaadir kaas oo looga hadlayo ammaanka Suuqa sidii loo adkeyn lahaa.