Muqdisho, 04-Sept-2007@[Baardhere.com] Dowladda Uganda ayaa ka dalbatay Qaramada Midoobey in ay ka wareegto Howsha Nabad Ilaalinta Soomaaliya.

Ergeyga Uganda u fadhiyay Golaha Ammaanka ee Q.M ayaa sheegay in Howsha Ciidan wareejinta Soomaaliya ay doonayaan in ay si dhaqse ah u dhacdo.

Isagoo ka hadlay Fadhiga Golaha Ammaanka ku yeeshay Magaalada New York ayaa Mr Bultagira uu sheegay Q.M ay ka sugayaan sidii ay u wajihi lahaayeen dalabaadyada ka imaanaya Dowladiisa ee ku aadan kala wareegida Howsha Nabad ilaalinta Soomaaliya.

"Waxaan Qaramada Midoobey ka dooneynaa in ay qaadato doorka aan Ciidamadeena ku geynay Meesha Qatarta Badan ee Caalamka, waxaana ku boorineynaa in ay nagala wareegto howsha aan Soomaaliya haatan ka wado"ayuu yiri Danjiraha Uganda u fadhiya Golaha Ammaanka.

Waxa uu sheegay in eedeymaha haatan ka yaala Dalkiisa ay tahay sababta ay Uganda Ciidamadeeda meel aad halis u ah ugu aamintay.

Laakiin maamulka Bush ayaa si weyn ugu riyaaqay ku lug lahaanshaha Uganda ee dalka Soomaaliya, isagoo ku booriyey wadamada kale ee Afrikaanka inay ciidamadooda u diraan soomaaliya.

Muqdisho, 04-Sept-2007@[Baardhere.com] Gudoonka Baarlamaanka Soomaaliya ayaa sheegay in Taliyeyaasha Ciidamada Booliska iyo Nabad Sugid ay ka dhaga adeegayaan amarada ka soo baxay Baarlamaanka ee ahaa in ay si dhaqse ah ku yimaadaan Magaalada Baydhabo.

Gudoomiye Kuxigeenka 1aad ee Golaha Baarlamaanka Prof. Maxamed Cumar Dhalxa ayaa ku eedeyay Jen. Cabdi Qeybdiid iyo Jen. Darwiish in ay ka dhaga fareysanayaan u yeeritaanka uu Baarlamaanku u yeray, isagoo sheegay in Maxamed Dheere keliya uu ka soo jawaabay amarkii Baarlamaanka.

"U yeeritaanka Baarlamaanka waxa keliya ka soo jawaabay waa Maxamed Dheere, waxaanu sheegnay inagu in ay muddo todobaad ah ku yimaadaan Magaalada Baydhabo, si Baarlamaanka uu su'aalo ku aadan howlahooda loo weydiiyo"ayuu yiri Prof. Dhalxa oo sheegay in Talyeyaasha Ciidamada Booliska iyo Nabad Sugida Qaranka ay ka dhaga fareysanayaan awaamiirta Baarlamaanka.

Saddexda Mas'uul uu Baarlamaanka ugu yeeray in muddo todobaad ah ku soo gaaraan Magaalada Baydhabo, ayaa la sheegay in wax laga weydiinayo xaaladaha Magaalada Muqdisho, oo ragaas lagu eedeynayo in ay wadaan howlo aanu baarlamaanka raali ka aheyn.

Dadka lagala baxo guryaha, Masaajidada, iyo kuwa xabsiyada loo taxaabo ayaa la sheegaaa in ay ka dambeeyaan saddexdaas Mas'uul, iyadoo dadka ay Ciidamadooda soo qabtaana aan la marsiin wax maxkamad ah.

Wasiirka Cadaalada Dowladda Soomaaliya Xasan Dhimbil Warsame ayaa dhowaan qudbad uu ka jeediyay Baarlamaanka waxa uu sheegay in Gudoomiyaha Gobolka Banaadir Maxamed Dheere uusan u qalmin xilka uu hayo, isagoo sheegay in Maxamed Dheere uu adeegsanayo sharciyo isaga u gaar ah waa sida uu yiri Xasan Dhimbil.

Muqdisho, 04-Sept-2007@[Baardhere.com] Ganacsatada Suuqa Bakaaraha ayaa si weyn uga deyriyay Ammaanka guud ee Suuqaas, iyadoo maalmihii la soo dhaafay ay xaalada suuqa noqotay meesha ugu ugaarsiga badan ee Magaalada Muqdisho.

Gudoomiyaha Gudiga Ganacsatada Suuqa Bakaaraha Cali Dheere ayaa sheegay in Xaalada Suuqa ay faraha ka baxday, isagoo tilmaamay in suuqa uu noqday meelaha ugu badan ee dadka rayidka ah lagu ugaarsado.

Waxa uu sheegay in Ganacsatada qaar aysan tagi karin suuqaas, sababo cabsi ay ka qabaan suuqaa oo dadkii ugu badnaa todobaadkan lagu dilay.

"Dowladda Kmg ah waxaan ugu baaqeynaa in ay soo fara geliso Xaalada Suuqa oo noqotay meesha ugaarsiga gaarku ka socdo"ayuu yiri Cali Dheere oo tilmaamay in shalay keliya gudaha Suuqa Bakaaraha lagu dilay ilaa shan ruux oo uu ku jiray Nin Professor ah.

Xaalada Suuqa weyn ee Bakaaraha oo ah Suuqa ugu ganacsiga ballaaran leh ee Soomaaliya ayaa maalmahan ahaa mid xaaladiisu ammaan aad looga deyrinayay, iyadoo marar qaarna uu suuqa isku bedelo, meelaha rasaasta iyo qaraxyada ay ka dhacaan.

Muqdisho, 04-Sept-2007@[Baardhere.com] Sida uu sheegay Prof Maxamed Cumar Dhalxa oo ah kuxigeenka Afhayeenka Baarlamaanka Soomaaliya waxaa socda qorshe Baarlamaanka kula xisaabtimayo hay’adaha dhaqaalaha ee xukuumadda iyo Maamulada dalka ka jira.

Dhalxa waxaa uu yiri " baarlamanka wuxuu u yeeray wasaaradda maaliyadda si wax looga weydiiyo waxqabadkeeda intii ay dhisneyd wasaaraddaasi, sidoo kale waxaa loo yeeray Madaxda Bankiyada.

Waxa uu intaasi raaciyay in arimahaan ay qeyb ka yihiin la xisaabtanka xukuumadda oo dhowaan Baarlamanka Federaalka Soomaaliya uu ku dhawaaqay.

Madaxda loo yeeray Waxaa ka mid ah Xisaabiyaha Guud ee Qaranka kaas oo Su’aalo la weydiin doono,sida uu sheegay kuxigeenka Guddoomiyaha Baarlamaanka.

Baarlamanka ayaa horey ugu yeeray xubno uu ka mid yahay guddoomiyaha gobolka Banadir Maxamed Dheere, Taliyaha ciidamada booliska Cabdi Qeybdiid iyo Taliyaha nabad sugidda Qaranka Maxamed Darwiish.