Muqdisho, 24-August-2007@[Baardhere.com] Inta badan la iskuma diidana
in Soomalidu ay wada hadashooo, falaanqeyso sidii xal joota ah loogu heli lahaa
dhibaatada jirta, sababtoo ah dalka iyo dadka waxay ku sugganyihiin xaalad aad u
liidata oo marba marka ka dambeysa ka sii dareysay oo ka sii xumaaneysay wixii
ka dambeeyey xornimadii!.
Haddaba haddii aan "dib-u-heshiin" la isku diidanayn, ma la isku raacsanyahay
ujeedada dib-u-heshiisiinta? Taasi jawaabteeda ma sahlana inta baddana waa kala
ujeeddo cidda wax tabbaneysa iyo tan wax laga tabbanaayo!
Sida la ogyahay
dagaalka sokeeye ee Soomaliya wuxuu salka ku haayaa ku takri fal iyo ku xad
gudub caddaalada bulshada "social justice", xuquuda shacabka iyo boobka
hantida qaranka iyo tan gaarka loo leeyahay, sida degaan, beero, xoolo, guryo,
dhul iwm.
Ujeedada
dib-u-heshiisiinta cid wax tabbanaysa "dhibanaha" waxay
tahay in la laga towba keeno wixii dhacay. Towbada waxay leedahay
shuruudo ku cad diinta islaamka sida in laga qoomameeyo gefkii la geystay, in
hantidii la boobay dib loo celiyo iyo in laga raali geliyo qofkii efka loo
geystay. In wixii lagu heshiiyey lagu dhaqmo oo xaq bursi dambe lag reebtoonaado.
Cidda wax laga tabbanaayo ujeedadooda maxay tahay? Shirarkii
dib-u-heshiisiinta faraha badnaa ee la qabtay waxaa
muuqata in ujeedada cidda wax laga tabbanaayo ujeedadooda ay tahay in wixii
hore la iska hilmaamo, oo loo cafiyo! xaqbursigii ay sidaas ku heleena loo
xalaaleeyo isla markaana loo joogteeyo, wixii lagu heshiiyeyna ay yihiin
tallaabo hor leh oo u horseedaysa xaqbursiyo cusub oo halkaa laga sii wado!
. "Kaaga kula lihi, keygana waa ii keligey"
Kala ujeedada
shirarka dib-u-heshiisiinta Soomaaliyeed waxay keentay in
iyadoo loo fadhiyo "dib-u-heshiisiinta" la bilaabo qabanqaabada shirka "dib-u-heshiisiinta"
kan ku xiga oo inta baddana looga hadlo qodobo kii ka horeeyey lagu soo qaadey
oo lagu heshiiyey! So ma haboonayn in shirkasta oo la qabto looga
hadlo wixii ka soo baxay, wixii ka hirgaley, wixii aan dhaqanelin, shirkii ka
horreeyay!
Iyadoo ay sidaas tahay ayaa haddana habka wada hadalka iyo
qabashada shirarka dib-u-heshiisiinta ay yihiin hab ka
fiican habka xoog adegsiga oo ay habbon tahay in la sii waddo - AAN WADA
HADALNO WAA AAN HESHIINO -
Dr O. Abdurahman.
Tafaftiraha bogga Baardhere.com
