Muqdisho, 30-August-2007@[Baardhere.com]  Waxaa xayiraad lagu soo rogey dhaqdhaqaaqa ‘tiknikada’ ay wadan jireen mas’uuliyiinta ka hartey maamulkii hore ee ‘Indhacadde’ islamarkaasna ku jira maamulka cusub ee Shabeellada Hoose, waxaana mas’uuliyiintaas ka mid ah Jaamac Baloow, Nuuriye Cali Faarax iyo Cali Ganey. Waxaa xayiraadaas soo rogey Wasaaradda Arrimaha Gudaha ee Dowladda Kumeelgaarka iyo saraakiil ka soo jeedda ciidamada Itoobiya.

Muqdisho, 30-August-2007@[Baardhere.com]] Guddoomiyaha Gobolka Shabeellada Hoose Dr. C/qaaddir Sheekh Maxamednuur ayaa ka warbixiyey nabadgelyada Gobolka, nidaamka canshuuraadka Gobolka, xiriirka maamulkiisa iyo kan militeriga, wadashaqeynta maamulkiisa, isbeeddelka maamul ee Degmada Afgooye iyo waxa uu ka ogyahay xirriiirka u dhaxeeyaa qaar ka tirsan maamukiisa iyo isbaheysiga Dooxada Jubba iwm.

Wareysiga oo dheeraa ayaan waxaan idiin soo bandhigeynaa qeybta ugu muhiimsan, wuxuuna u dhacey sidatan:

S-Guddoomiye waxaad ka warrantaa nabadgelyada guud ee Gobolka?

J-Nabadgelyada Gobolku haatan waa okey, waxaana ku tilmaami karaa inay tahay 80% mid wanaagsan.

S-Nidaamka Canshuuraadka ee aad mudada dheer Muqdisho u joogtey maxaa kaaga hirgaley, mase dhaqangeliseen nidaamka idinka iyo Wasaaradda Maaliyaddu dejiseen?

J-Waxaan iminka wadnaa shirar arrintaas lagu dhaqan gelinaayo, ka dib waxaan soo saareynaa wareegtooyin howshaas aan ku socodsiineyno, meel fiican ayayna noo mareysaa.

S-Guddoomiye, maxaad kala socotaa dhaqdhaqaaqa la doonaayo in maamulka Degmada Afgooye dib loo magacaabo mar haddii aad tahay Guddoomiyihii Gobolka?

J-Arrimahaas waxbaan ka maqlley hase yeeshee wax rasmi ah iminka kama haayo. Waxaan sameynayaa u-kuurgal si aan u ogaado wixii dhabta ah oo jira. Laakiin waxaad ogaataa in arrintaas ay u dhaxeeyso Wasaaradda Arrimaha Gudaha iyo Xildhibaanada Degmada.

S-Guddoomiye waxaad ka warrantaa nabadgelyada deegaannada Baraawe iyo Sablaale iyo maamulkii loo dhisey inuu shaqeeyo iyo in kale?

J-Inkastoo ay jiraan dhibaato badan haddana maamulkii la dhisey waa joogaa oo howshooda ayay wataan inta kaaraankooda.

S-Waxaad ka warrantaa xiriirka wadashaqeeneed ee u dhaxeeya Guddoomiyaha Degmada Baraawe iyo Dhuxuloow?

J-Waxaan ogahay in ay wadajoogaan Baraawe oo wadashaqeyn in ay u dhaxeeyso ayaan filayaa. Laakiin waxaan ku tala jiraa in aan mardhow gaaro Baraawe iyo Sablaale. Wixii dhib ah oo jirana markaas ayaan xalin doonnaa Insha Allah.

S-Waxaad ka warrantaa xubnaha maamulka Gobolka sida agaasimeyaasha oo kale ma dhameystiran yihiin?

J-Howshaas weli waa wadnaa waana ku dhax jirnnaa.

S-Waxaad ka warrantaa xirriirka Militeriga Guutada Sagaalaad iyo Gobolka kuwaas oo horey khalkhal geliyey ammaanka Gobolka; wada shaqeyn ma idin ka dhaxeeysaa?

J-Arrintaas waxaa xasiliyey Wasaaradda Gaashaandhigga. Inta harteyna waxaa dejiyey isbedelka lagu sameeyey taliyeyaasha ururada, Abbaanduulaha iyo Taliyaha Guutada oo dhan.

S-Ciidamada Guutada 9aad inay kala tageen ayaan maqalney ee maxaa ka jira warkaas?

J-Wax tagey way jiraan kuwo fallaagobey oo burcad isu beddeleyna waa la soo eryey laakiin intooda badan way joogaan waxayna ku jiraan xerooyinkooda, wax dhib ahna haatan Gobolka kuma hayaan.

S-Wadashaqeyn dhinaca nabadgelyada iyo xiriir ma idin ka dhaxeeyaan madaxda ciidanka Guutada 9aad?

J-Xiriir fiican ayaa naga dhaxeeya, laakiin wax wadashaqeyn ammaan sugid ah ma jiraan oo ay noo hayaan laakiin maalmaha dhow inay toos shaqada loo soo direy u billaabaan iyo inay iska tagaan wax ka dhaxeeya ma jiri doonaan.

S-Waxaad ka warrantaa xiriirkaaga iyo taliyaha guutada 9aad?

J-Taliyaha guutada 9aad Kornel Saanisaani waa na soo booqdaa oo xafiiska ayuu noogu yimaadaa annagana waan u tagnaa. Laakiin weli nidaam shaqo kama aan wada hadlin hase yeeshee dhowaan ayaan howshaas guda geli doonnaa Insha Allaah.

S-Gudoomiye waxaad ka warrantaa ciidamada Militerigu waxay dhac badan u geysteen dukaamada, dhaca mobeyllada iyo ammaandarro guud oo ay u geysteen Gobolka. Hadda ma waxaad i leedahay waxaas oo dhan hadda waay joojiyeen?

J-Haa si buuxda ayay u joojiyeen kuwii ugu xummaa ee dhaca geysanaayey xagga iyo Lambar Konton ayay u carareen waxayna falal xun ka wadaan inta u dhaxeysa Lambar Konton iyo Afgooye. Tallaabo ayaana ka qaadeynaa, laakiin kuwa harey waxay joogaan inta u dhaxeeysa Marka ilaa Ceel-Wareegoow.

S-Guddoomiye maxaad kala socotaa xiriirka u dhaxeeya Isbaheysiga Dooxada Jubba (IDJ) oo dib isu soo abaabuley oo ilaa Xaramka soo gaarey?

J-Maamulka Jubbooyinka ee meesha ku harey iyo maamulkeenna ma jiro wax xiriir ah oo naga dhaxeeya mana jirto militeri iyo ciidan iska daayee xittaa wadahadal nama dhaxmarin.

S-Guddoomiye waxaa la xaqiijiyey in Guddoomiye Kuxigeenka Degmada Baraawe Cabdullaahi Xalane Dhuxuloow uu xiriir fiican la leeyahay qoladaas (IDJ), ciidamana isu diraan. Maxaad arrintaas kala socotaa?

J-Arrintaas "Qiila iyo Qaala" weeye, annaga wax na soo gaarey ma jiraan. Haddii ay jirtana waa wax naga qarsoon. Hase yeeshee haddiiba ay jirto waa wax asaga u gaar ah mana aha wax maamulka ka turjamaya.

Muqdisho, 30-August-2007@[Baardhere.com]] Shirkii Dib u Heshiisiinta Beelaha Soomaalida uga soconaya Magaalada Muqdisho ayaa maanta lagu wadaa in la soo gaba gabeeyo, iyadoo la filayo in ay ka soo qeyb galaan Madaxda Dowladda iyo wafuud ka socota Beesha Caalamka.

Shirka Dib u Heshiisiinta oo muddo 45 cisho ka socda Xarunta Gaadiidka Booliska ayaa la filayaa in maanta uu soo xiro Madaxweynaha Soomaaliya C/llaahi Yuusuf Axmed oo kal hor 15-kii Bishii Julay uu furay.

Mas'uuliyinta ugu sareysa Dowladda oo uu horkacayo Madaxweynaha, Ra'iisul Wasaaraha, wasiiiro iyo marti sharaf kale ayaa la filayaa in ay ka qeyb galaan xeritaanka shirka oo ammaankiisa aad loo adkeeyay.

Wararka ku dhow dhow Xarunta Shirka ayaa sheegaya in si weyn loo adkeeya Ammaanka goobaha ku dhow dhow ee xarunta Shirka, iyadoo Ciidamo fara badan oo Ethiopian iyo Soomaali isugu jirta la soo dhigay hareeraha agagaarka shirka.

Cali Mahdi Maxamed oo ah Gudoomiyaha Shirka Dib u Heshiisiinta ayaa sheegay in shirka maanta la soo gaba gabeyn doono, isagoo tilmaamay in wali aanay dib u heshiisiinta dhamaan, waxa uuna xusay in dib u heshiisiinta ay ka socon doonto degmooyinka, tuulooyinka iyo Magaalooyinka Dalka sida uu hadalka u dhigay.

Agagaarka Shirka Dib u Heshiisiinta sida Degmooyinka Shangaani, C/casiis, Shibis, Kaaraan iyo Boondheere ayaa ammaankooda aad loo adkeeyay, waxaana lagu wadaa in kulanka maanta in ay ka soo qeyb galaan Wafuud ka socota Beesha Caalamka.

Dadweynaha Soomaaliyeed ayaa siyaabo kala duwan uga hadlaya xeritaanka shirkan iyo shirka kale ee Asmara ka furmaya, kuwaasoo dan soomaaliyeed loogaga haldayo.

Wixii warar iyo Sawirada Xeritaanka Shirka Dib u Heshiisiinta Qaran wan idin soo gud bin doonaan haduu alle idmo.

Muqdisho, 30-August-2007@[Baardhere.com]] Waxaa saaka xiran qeybo ka mid ah Wadooyinka waa weyn ee Magaalada Muqdisho, iyadoo Ciidamadii ugu faraha badnaa la soo dhoobay qeybo ka mid ah Isgoysyada magalaada.

Inta badan wadooyinka halbowlaha u ah isu socodka Magaalada ayaa xiran, waxaanu jirin isticmaalka gaadiidka iyo dadkaba.

Waxaa la arkayay Dad fara badan oo lugtooda maalaya, kuwaasoo isaga kala gooshayay qeybo ka mid ah Magaalada.

Ciidamada Ethiopia iyo kuwa Dowladda ayaa raxan raxan u tubnaa wadooyinka, iyagoona dadka ka celinaya wadooyinka.

Ma jirto baaritaano ay Ciidamadan sameynayaan, waxaase la sheegayaa in dadka iyo gaadiidkaba ay u diidayaan isticmaalka wadooyinka ku dhow dhow Xarunta Shirka Dib u Heshiisiinta.

Xeritaanka qeybo ka mid ah Wadooyinka Caasimada Muqdisho ayaa la sheegay in ay ka dambeysay sababo dhinaca ammaanka, xilli maanta la filayo in la soo gaba gabeeyo shirka dib u heshiisiinta qaran.

Muqdisho, 30-August-2007@[Baardhere.com]] Iska hor imaad aad u qaraar ayaa habeenimadii xalay ka dhacay qeybo ka ah Magaalada Muqdisho, kaasoo si daran la isugu adeegsaday Madaafiicda iyo hubka fud fudud.

Deegaanka SOS iyo Suuqa Xoolaha ee Degmada Huriwaa oo ay ka dhaceen Dagaalo ba'an ayaa waxaa isaga soo horjeeday Ciidamada Dowladda iyo kooxaha kacdoonada wada.

Qeybo ka mid ah Degmada Huriwaa ayaa xalay waxaa ku habsaday Madaafiicda kala duwan ee ay xalay is weydaarsanayeen, kooxihii dagaalamayay, waxaana lagu soo waramayaa in xaafado ka tirsan Degmadaas ku dhaceen Madaafiic.

Wararka laga helayo deegaankaas ayaa sheegaya in xaalada deeganadii xalay ay dagaaladu ka dhaceen ay saaka deganeyd, hase ahaatee ay xiran yihiin wadooyinka qaar ee Deegaanadaas.

Sidoo kale Dagaal xalay fiidkii ka dhacay Degmada Hodan ayaa waxa uu ka dambeeyay kadib markii kooxo aan la garaneyn ay Bambaanooyin ku weerareen Saldhiga Degmada Hodan, waxaana weerarkaas kadib dhacay dagaal toos ah.

Ma cada qasaarooyinkii ka dhashay iska hor imaadyadii xalay gil gilay Magaalada, waxaase la sheegayaa inuu jiro dhawacyo soo gaaray dad rayid ah oo rasaas habow ah ay ugu tagtay guryahooda.

Si kastaba ha ahaatee Xaalada Magaalada Muqdisho ayaa u muuqaneysa, mid faraha ka sii baxeysa, xilli ay sii kordhayaan weerarada iyo qaraxyada sil siladaha ah ee ka dhacaya Caasimada.

Muqdisho, 30-August-2007@[Baardhere.com]] Qaar ka mid ah Ergooyinka Beelaha Soomaalida uga qeyb galaya Shirka Dib u Heshiisiinta Qaran ayaa qeylo dhaan xoogan ka muujiyay xeritaanka Shirka Dib u Heshiisiinta Qaran oo maanta la filayo in la soo xero.

Kadib 45 cisho uu Magaalada Muqdisho ka soconaya shirweynaha qaran ee Dib u Heshiisiinta Beelaha Soomaalida ayaa la filayaa in maanta la soo gaba gabeeyo, xilli ay sii kordheysoi qeyla dhaanta ka imaaneysa Ergooyinka.

Ergooyinka qaar ayaa qaba inaan lagu deg degin gaba gabeynta shirka oo ay sheegayaan in ay wali ay dhiman yihiin qodobo aan la isla meel dhigin.

Laakiinse Cali Mahdi oo ah Gudoonka Shirka ayaa isna ku doodaya in Shirka laga gaaray guulo waa weyn, waxa uuna xusay in qodobkii ugu dhibka badnbaa ee heshiisiinta Beelaha Soomaalida laga soo gudbay, kaasoo uu tilmaamay in beeluhu ay is cafiyeen.

Ergada ayaa waxa ay yihiin, kuwo fikrado kala duwan ka keenaya xeritaanka shirka ee maanta lagu wado, waxaan ergada qaarkood ay taageersan yihiin xeritaanka shirka.

Dadka qaarkii ayaa aamisan in wali ay jirto Colaadihii Beelaha Soomaaliyeed, isla markaana aysan waxba ka soo naasa cadaan heshiiska khilaafaadkii Beelaha Soomaalida shirka dib u heshiisiinta oo ay isku cafiyeen, waxaana Deegaano ka tirsan Gobolada Dhexe ka ololaya colaado u dhaxeya Beelo soomaaliyed oo dagaal dhimasho iyo dhaawac fara badan ka dhashay u dhaxeeya wali.

Gudiga uu hogaamiyo Cali Mahdi ayaa la sheegayaa inuu ku guuldareysteen meel marinta qodobo aad u xasaasi u ahaa, sida Qodobka Xagjirnimada Diineed iyo ka doodista Kheyraadka Dalka, kaasoo u muuqday mid si hoose looga hadlay, waxaana jiray in markii shirka la soo hordhigayay qodobadaas inuu dhaliyay murano xoogan.

Si kastaba ha ahaatee shirka dib u heshiisiinta qaran ee 45 cisho ka socda Magaalada Muqdisho ayaa la aamisan yahay in looga gudbay qodobo muhiim ah, hase ahaatee waxaa moodaa in ay wali harsan yihiin qodobo geedi socod u noqon kara siyaasada dalka.